Віншаванні біскупа Гродзенскага Аляксандра Кашкевіча на свята Божага Нараджэння і Новы год

Апошнія тыдні, якія мы перажывалі, адзначаліся вялікімі намаганнямі і працай. Мы прыводзілі ў парадак свае дамы, рабілі генеральную ўборку. Кожная гаспадыня дома клапацілася аб тым, каб прыгатаваць урачыстую вігілійную вячэру і парадаваць сваіх хатніх смакам традыцыйных страваў.

Рыхтаваліся мы і духоўна. Нашы святыні былі напоўнены вернікамі, а найперш дзецьмі і моладдзю, якія пад спеў адвэнтавых песень ішлі ў працэсіі, трымаючы запаленыя ліхтарыкі. Разам з Марыяй мы чакалі гэтага моманту. Яна стала нашай асаблівай Правадніцай, Яна распавядала нам, як падрыхтаваць сваё сэрца да прыйсця Божага Сына.

Бэтлеемскі агонь міру чарговы раз прыбыў да нас з Пячоры Нараджэння Езуса Хрыста. Там нарадзілася — як піша св. Ян — праўдзівае Святло, што асвятляе кожнага чалавека, калі прыходзіць у свет. Бэтлеемскі агонь міру наблізіў да нас яшчэ больш атмасферу гэтых радасных святаў.

Менавіта з гэтага месца, якое стала непасрэдным сведкам нараджэння Езуса Хрыста, сыходзіць сення тэрміновы заклік да кожнага з нас, да людзей добрай волі, а таксама да тых, хто ўсё яшчэ шукае праўды і сэнсу жыцця. Усе мы — ад найменшага да найбольшага — пакліканы да будаўніцтва міру. Мы павінны ўносіць гэты мір у нашы сэрцы, у нашы сем’і, грамадства, паўсюль, дзе мы жывем, дзе мы есць, каб чалавецтва прыняло пасланне міру, якое нясе Божае Нараджэнне!

Mы молімся ў гэты час асабліва за тыя месцы, дзе ідуць канфлікты і дзе пакутуюць нявінныя людзі. Просім, каб народжаны Езус, Князь супакою, адорваў усіх супакоем сэрца, шчырай любоўю, сардэчным позіркам, каб усе людзі на зямлі здолелі супольна шукаць шляхоў любові і міру.

Няхай гэтыя мае словы, поўныя пастырскай любові разам з пажаданнямі моцна чаканага міру, дойдуць ва ўсе куткі нашай дыяцэзіі, да тых, хто цешыцца ласкай веры, і да тых, хто працягвае шукаць праўды і любові.

Няхай гэта будуць святы паяднання, бо хто дзеліцца аплаткай, хлебам, той ніколі не кіне ў іншага чалавека камень.

Няхай гэта будуць таксама святы любові, таму што Бог з любоўю паслаў свайго Сына, каб Ён нас збавіў. Ён вучыць нас гэтай любові, каб і мы любілі адзін аднаго, як Ён нас палюбіў.

Умілаваныя ў Хрысце Пану Браты і Сёстры!

Мы зноў перажываем таямніцу Божага Нараджэння, якое нясе свету збаўленне, а ўсім людзям — радасць і мір. Станем з пастухамі перад стаенкай, каб разам з Марыяй сустрэць чаканага народамі Адкупіцеля чалавека. А ў нованароджаным Дзіцяці, спавітым і пакладзеным у яслі, прывітаем Бога, які прыходзіць, каб наведаць нас і накіраваць нашы крокі на шлях спакою.

Даручаючы вас апецы Багародзіцы, якая нарадзіла свету Збаўцу, дзялюся з вамі традыцыйнай аплаткай і да віншаванняў далучаю благаслаўленне ў імя Айца, i Сына, i Духа Святога. Амэн.