Калі князі размаўлялі па-беларуску: гісторыю Беларусі ў малюнках для дзяцей прывязуць у Гродна

Кнігу пра часы, калі князі размаўлялі па-беларуску, а нашая дзяржава распасціралася ад Балтыйскага да Чорнага мора, прывязуць у Гродна. Прэзентацыю кнігі Уладзіміра Арлова і Паўла Татарнікава «Айчына: маляўнічая гісторыя. Ад Рагнеды да Касцюшкі» злядзяць ў «Цэнтры гарадскога жыцця» (Савецкая вуліца, 3) а 18:30 ў сераду, 22 сакавіка. Аўтары згодныя на аўтограф- і сэлфі-сесію.

Фота: symbal.by

Кніга «Айчына» стала першым каляровым выданнем для дзяцей і падлеткаў аб гісторыі нашай краіны. Пакуль выйшла толькі першая частка, якая раскажа пра часы ад з’яўлення на нашых землях старажытнага чалавека да паўстання Тадэвуша Касцюшкі.

— Вы здзейсніце захапляльнае падарожжа ў часе. З Полацкай зямлі эпохі Рагвалода і Рагнеды, Усяслава Чарадзея і Еўфрасінні вы трапіце ў іншыя старажытнабеларускія княствы — Смаленскае і Тураўскае, а затым — у Вялікае Княства Літоўскае, — піша Уладзімір Арлоў у прадмове да твора. — У гэтай магутнай дзяржаве, якая ў часы росквіту распасціралася ад Балтыйскага да Чорнага мора, панавала беларуская культура, а нашая мова была дзяржаўнаю. На ёй гаварылі вялікія князі ды магнаты, на ёй пісалі законы і вялі дыпламатычнае ліставанне, складалі летапісы і друкавалі кнігі.

Кніга ў першую чаргу створаная для дзяцей і падлеткаў, але будзе цікавая і карысная таксама для дарослых. Яна багата ілюстраваная мастаком Паўлам Татарнікавым. Цікава, што Павел Татарнікаў працаваў над кнігай шэсць гадоў, Уладзімір Арлоў — чатыры. Прафесійнае журы пісьменнікаў і чытачы ў народным галасаванні ўключылі «Айчыну» ў тройку лепшых кніг 2016 года.

Пачатак прэзентацыі а 18:30, але набыць кнігу можна будзе ад 15:00, падпісаць у аўтараў — ад 17:00. Уваход на прэзентацыю вольны.

Дарэчы, ідзе праца над другой часткай кнігі, якая распавядзе гісторыю да аднаўлення беларускай незалежнасці на пачатку 1990-х.