Гран-пры «Каложскага благавесту» атрымаў хор студэнтаў з Расіі
Лепшым выканаўцам фестывалю «Каложскі благавест» быў абвешчаны хор студэнтаў Казанскай дзяржаўнай кансерваторыі імя Назіба Жыганава.
Як паведаміў прэс-сакратар Гродзенскай епархіі Георгій Рой, журы вызначала лепшых выканаўцаў асобна сярод хароў і ансамбляў раённых і абласных цэнтраў, сярод дзіцячых калектываў, святарскіх і свецкіх аматарскіх хароў.
Цікава, што ў шэрагу намінацый — дзіцячыя калектывы, царкоўныя ансамблі епархіі і раённых цэнтраў, а таксама Гродна і іншых абласных гарадоў — журы вырашыла не прысуджаць першыя месцы.
У катэгорыі «Царкоўныя хоры Гродна і іншых абласных гарадоў» перамог хор «Аватамк» з Еравану. А яго кіраўнік Рафі Мікаеліяну стаў лепшым дырыжорам.
Першым сярод царкоўных хароў епархіі і раённых цэнтраў журы вызначыла ўкраінскі калектыў з Кузняцоўска Ровенскай вобласці.
Румынскі мужчынскі хор «Святы Лявонцій» з горада Рэдэуць заваяваў званне лепшага са святарскіх хароў і калектываў духоўных школ.
Гомельскі народны моладзевы хор «Адраджэнне» атрымаў першае месца ў катэгорыі «свецкія аматарскія калектывы».
Нагадаем, што ў мінулым годзе гран-пры фестывалю атрымаў таксама студэнцкі хор — Маскоўскай дзяржаўнай кансерваторыі.
Чытайце таксама:
Украінскі хор не змог выехаць з Кіева на «Каложскі благавест»